Lawmna tlang

Lalpa nangin min hria ka nun chhungril zawng nen, Ka hun pumin min hruai chhinchhiahna mak tak nen; Min hriatrengna hi ka tan a va hlu em, Chauh chang awm thin mahse Lalpa ka zui ang che. Ka Lal leh ka Pathian awm reng i lo ni e, Tunge hrilhfiah zo ang le? Mihring finna hian a chhui phal mawlh si lo, Fak tawk theih che ka nuam, hei hi ka duhsam ber. Ka tan i remruatah lungawi ka tum ngai lo, Vuina hlira khatin duh tin ka dil thin che; Mahse, nangin min hria ka mamawh chauh min pe, Lungawina tlang thawveng boruak min hip tir thin. Harsat, mangan, buaina, hrehawmnaten min bawm, Damchhung khawsak lungkham vangin ka rum fo thin; Lungngaia ka awmin Lalpa'n min ngaihtuah thin, Tahna ruam atangin lawmna tlangah min lawn tir.